Kontratuaren esparruan egin beharreko prestazioak hiru multzo handitan biltzen dira
Gasteizko Udaleko gobernu batzordeak udal igerilekuak berme osoarekin kudeatu eta mantentzeko zerbitzua kontratatzea onartu du ostiral honetan, 3.900.572 euroko aurrekontuarekin. Kontratuak 30 udal igerileku barne hartzen ditu (estalitako 22 eta estali gabeko zortzi), eta lau urteko exekuzio aldia planteatzen du (bi kontratu barruan eta bi luzapen gisa).
Izaskun Reyes Udal Eraikinen Mantentze Lanetako zinegotziak azaldu du Udal Eraikinen Mantentze Zerbitzuak eta, oro har, Udalak kudeatutako kontratu garrantzitsuenetakoa dela igerilekuena, «hiri honen bihotzaren parte direlako, erabiltzaile batzuek urtean zehar egunero erabiltzen dituztelako eta beste batzuentzat oinarrizko elementua direlako, udan falta ezin dena».
«Gainera, belaunaldi arteko instalazioak dira, herritar guztiei ematen baitiete zerbitzua, txikienetatik hasi eta helduenetaraino. Horregatik guztiagatik, gaur lizitatu dugun kudeaketa eta mantentzea funtsezkoa da Gasteizentzat eta bertako biztanleentzat», ziurtatu du.
Enpresa esleipendunak funtzionamendu eta segurtasun egoera ezin hobean eduki beharko ditu igerilekuak erabiltzaileentzat, instalazioentzat eta lantaldeentzat. Era berean, behar diren kontsumoak eta datuak etengabe kuantifikatu eta erregistratuko ditu.
Kontratuaren esparruan egin beharreko prestazioak hiru multzo handitan biltzen dira: igerilekuetako uraren kalitatea bermatzeko beharrezkoak diren produktu kimiko guztien hornidura, urteko egun guztietan egunean 24 orduz mantentze integrala kudeatzea (prebentziokoa, zuzenketakoa eta normatiboa), eta erabateko bermea ematea, hau da, instalazioetan hondatu daitezkeen elementu guztiak konpontzea edo ordezkatzea.