‘Mal de Altura Tour’ kamisetak salgai daude jada 20 euroan, eta 687 53 01 43 zenbakira deituta edo Instagram bidez (@brutmountains) eros daitezke
Brut Mountains arabar gazte alpinisten taldeak bere ibilbideko erronka handienetako bati aurre egingo dio uda honetan, Bolivian 6.000 metrotik gorako lau mendira igoz Mendikate Errealean eta Andeetako goi-lautadan: Huayna Potosi (6.088 metro), Parinacota (6.300 metro), Sajama (6.542 metro) eta Illimani (6.460 metro).
Ekimenaren aurkezpenean azaldu dutenez, Marokoko Atlasean (2022), Irango sumendietan (2023), Ekuadorko Andeetan (2024) eta Kirgizistango Pamirren (2025) espedizioak arrakastaz osatu ondoren, taldeak erronka berriari egin behar dio aurre orain, altitudea, autosufizientzia eta muturreko inguruneetan erabakiak hartzea uztartzen dituena. Erronka berriak «aurrerapauso erabakigarria» izan nahi du etorkizunean are handiagoak izango direnak lortzeko.
Espedizioa uztailaren 30an hasi eta abuztuaren 16ra arte luzatuko da. Muturreko baldintzetan egingo da, prestakuntza fisiko, logistiko eta mental zorrotza eskatuko du, eta taldeak, aurrera egiteko, aklimatazio progresiboa izango du oinarri lau gailurretan, errendimendua, segurtasuna eta ingurune naturalarekiko errespetua uztartuz
Taldea bost gazte alpinistek osatzen dute: Eneko Goñi (21 urte), Ibai Aguirre (23 urte), Ibai Gonzalez de Audikana (26 urte), Xabier Agirre (26 urte) eta Pabi Lahidalga (55 urte), guztiak mendiko ibilbide sendokoak. Erronkaren bidez, muga berri bat gainditzea ez ezik, goi-mendia eta natura publikoari hurbiltzea ere bilatzen dute, hango paisaia, ondarea eta kultura ezagutaraziz, adiskidetasunetik eta errespetutik.
Ana del Val Arabako Aldundiko Kultura eta Kirol Saileko foru diputatuak honelako ekimenen balioa nabarmendu du: «Horrelako proiektuek, hala nola Brut Mountains taldearenak, ahaleginari, diziplinari eta norberaren gainditzeari balioa ematen diote, eta balio horiek bultzatzen jarraitu nahi dugu Arabako gazteen artean».
«Espedizio horietako bakoitzak Arabako talentua proiektatzen du gure mugetatik harago. Kultura eta Kirol Sailean jarraituko dugu laguntzen gure lurraldea harro ordezkatzen dutenei, hala nola alpinista talde honi. Arrakasta handia opa diegu, eta, batez ere, abiapuntu duten ilusio berarekin itzultzea», azaldu du.
MAL DE ALTURA TOUR
Bestalde, Pabi Lahidalga alpinistak uda honetan aurre egin beharko dioten erronkaren exijentzia azpimarratu du: «Aurtengo helburua asmo handikoa da bereziki. Egun asko emango ditugu 6.000 metrotik gora, ohi baino gehiago agian, eta horrek aparteko zailtasuna dakar; horregatik eman diogu espedizioari izen hau: ‘Mal de Altura Tour'».
«Desnibel oso handia espero dugu, eta eguraldiaren eta glaziarretako elurraren egoeraren mende egongo gara erabat, asko aldatzen baitira mendi batetik bestera. Inprobisatu egin beharko dugu, eta zirt edo zart erabaki. Ez da ohikoa hain denbora laburrean sei mila metro baino gehiagoko lau gailur kateatzea, eta horregatik hain zuzen ere, proiektu honek hainbeste motibatzen gaitu», gaineratu du.
Kirol alderdiaz gain, Brut Mountains taldeak gazteen mendizaletasuna ikusarazteko konpromisoa hartu du. Hori dela eta, bideoz dokumentatuko da espedizioa, ondoren sareetan, hedabideetan eta dibulgazio ekitaldietan zabaltzeko.
‘Mal de Altura Tour’ kamisetak salgai daude jada 20 euroan, eta 687 53 01 43 zenbakira deituta edo Instagram bidez (@brutmountains) eros daitezke.
