Arabako Foru Aldundiak35 proiektu babestuko ditu aurten 377.000 euro baino gehiagoko inbertsioarekin
Arabako Foru Aldundiak35 proiektu babestuko ditu aurten 377.000 euro baino gehiagoko inbertsioarekin, udaletan eta kuadrilletan turismo azpiegiturak eta baliabideak modernizatzeko. Jarduketen bidez, lurraldeak eskaintzen dituen zerbitzuak eta turismo esperientziak hobetzea eta kalitatezko helmuga jasangarri eta irisgarri gisa sendotzea du helburu.
Arabako Foru Aldundiko Enplegu, Merkataritza eta Turismo Sailak aurten 377.000 euro baino gehiago bideratuko ditu lurralde historikoko turismo azpiegiturak eta baliabideak modernizatzera, udalei eta kuadrillei zuzendutako bi laguntza lerroren bidez. Helburua da Arabak bidaiarien eskura jartzen dituen turismo zerbitzuak eta esperientziak hobetzea, eta, horrela, lurraldea kalitatezko helmuga jasangarri eta irisgarri gisa finkatzea.
Cristina Gonzalez Enplegu, Merkataritza eta Turismoko foru diputatuak eta Felipe Garcia arloko zuzendariak ostiral honetan aurkeztu dituzte deialdien ebazpena, eta foru erakundeak finantzatuko dituen Arabako toki erakundeen 35 proiektuen berri eman dute. «Natura, ondare eta enogastronomia helmuga gisa dugun lehiakortasuna indartu nahi dugu», nabarmendu du Gonzalezek.
Bere hitzetan, «gure lurraldea aisialdiaz gozatzeko aukeratzen duten bidaiariei gero eta zerbitzu eta esperientzia gehiago eskaintzen dizkien kalitatezko helmuga jasangarri eta irisgarria da».
Azaldu duenez, deialdiek hainbat jarduketa finantzatuko dituzte, hala nola aterpetxeak, interpretazio zentroak eta turismo bulegoak hobetzeko proiektuak, begiratoki eta aparkaleku berriak gaitzea, bizikletak alokatzeko sistemak abian jartzea, edota mendi ibilaldiak eta ondare ibilbideak sortzea. «Gure helburua da lurraldean bidaiarien desestazionalizazioan eta banaketan aurrera egitea, eta denbora gehiago geratzea eta arabarrei enplegua eta aberastasuna sortzea«, gaineratu du.
Gonzalezek nabarmendu du Araba «bide onetik» doala: «2026ko urtarrila-maiatza aldiko datuen arabera, bidaiarien sarrera eta kontratatutako gaualdiak %3 hazi dira gure ostatuetan, aurreko urteko aldi berarekin alderatuta. Hazkunde horri esker, okupazioa eta batez besteko egonaldia %5,5 igo dira iazko aldi beraren aldean, eta batez besteko egonaldia 2,32 egunekoa izan da, Euskadiko altuena«.
Bada, Arabako kuadrillei zuzendutako laguntza lerroak 167.264 eurorekin finantzatuko ditu proiektuak Arabako Mendialdean, Aiaraldean, Arabako Errioxan eta Gorbeialdean.
Era berean, udalentzako laguntza lerroak 210.000 euroko aurrekontua du eta proiektuak finantzatuko ditu Gasteiz, Agurain, Zanbrana, Lantaron, Urizaharra, Okondo, Amurrio, Iruraiz-Gauna, Lagran, Gaubea, Erriberagoitia, Alegria-Dulantzi, Añana, Artziniega, Eltziego, Guardia, Bastida, Bernedo eta Donemiliaga udalerrietan.
