«Zara-Mugi pertsona guztiek espazio publikoa erabiltzea sustatzeko, aisialdi partekatua eta osasungarria sustatzeko eta belaunaldien arteko harremanak indartzeko helburuarekin sortu da. Eta hori guztia kulturaren eta kirolaren esparruetatik»
Gasteizko Udaleko Gobernu Irekiaren eta Gizarte Etxeen Sailak Zara-Mugi programa jarriko du martxan uztailaren 23an, eta kultur eta aisialdi partekatuko hainbat ekimen eskainiko ditu Zaramaga auzoko espazio publikoetan, publiko mota orori zuzenduta eta doan.
Miren Fernandez de Landa Gobernu Irekiaren eta Gizarte Etxeen zinegotziaren hitzetan, «Zara-Mugi pertsona guztiek espazio publikoa erabiltzea sustatzeko, aisialdi partekatua eta osasungarria sustatzeko eta belaunaldien arteko harremanak indartzeko helburuarekin sortu da. Eta hori guztia kulturaren eta kirolaren esparruetatik».
Programa antolatzeko parte hartze prozesua egin zen auzoko elkarteekin, eragileekin, merkataritzako eta ostalaritzako sektorearekin eta partikularrekin, eta egin beharreko ekintza motak zehaztu ziren. «Auzoko bizitza dinamizatu nahi dugu, beste eremu batzuetako pertsonak ere erakartzeko ekintzen bidez. Espazio publikoa erabiltzeko ohiturak sustatu nahi dira, betiere topaleku, bizikidetza eta aisialdirako leku gisa», gaineratu du Fernandez de Landak.
Zara-Mugi Eusko Jaurlaritzaren Etxebizitza eta Hiri Agenda Sailak onartutako auzoak berroneratzeko Inbertsio Estrategikoen Planean jasotako jarduketen barruan dago, eta Gasteizko Udalak Zaramaga auzoaren hiri, gizarte eta ingurumen berroneratzean jarduteko duen konpromiso estrategikoetako batetik dator.
Egitaraua uztailaren 23an hasiko da, Trío Galea hirukoteak eskainitako dantzaldiarekin, Laudio plazan, 19:00etan. Astebete geroago, hilaren 29an, Zirika Zirkus taldeak familia antzerkia eskainiko du, ‘Sinfonia Afonika’ lanarekin, leku eta ordu berean.
Abuztuan, hitzorduek umorearekin izango dute zerikusia, eta guztiak Deba eraikineko lorategietan eskainiko dituzte: hilaren 28an, ‘Monólogos a dos bandas’ bakarrizketa eskainiko dute Andoni Agirregomezkortak eta Leire Ruizek, 19:00etan; hurrengo egunean, familientzako ‘Inprodantz’ dantza eta antzerki ikuskizuna eskainiko dute Itxaso Kintanak eta Andrea Covadongarenk, 12:30ean, eta Agustín Jimenezek ‘¿Quién soy yo?’ bakarrizketa 19:00etan. Abuztuaren 30ean, 12:30ean, Joseba Perezen ‘Por lo que sea’ lana izango da.
Irailaren 10ean, Demode Quartet taldeak ibilbidea egingo du auzoan zehar 19:00etatik aurrera, eta hilaren 24an, Jaian Jai dantzaldia izango da 19:00etan Laudioko plazan. Programazioak urrian jarraituko du kirol ibilaldi herrikoi batekin, eta azaroan amaituko da.
