Gasteizko Olaranbeko futbol zelaiak berritu dira
Gasteizko Olaranbeko instalazioetako 3. futbol zelaiak itxura berria hartu dute, belar artifiziala ordezkatzeko egindako obrak amaitu baitira. Gasteizko Udaleko Hiri Ereduaren Sailak 385.932 euro inbertitu ditu berdegune osoa hobetzeko, azken belaunaldiko belar artifiziala jarrita lehendik zegoenaren ordez. Mondo Ibérica S.A. enpresak egindako lanak azken 12 asteetan burutu dira.
Udalak adierazi duenez, Olaranbeko zelai berriaren ezaugarri nagusia oinarri elastiko aurrefabrikatu baten gainean instalatuta egotea da, eta ez, orain arte bezala, kautxuzko edo hondarrezko ohiko betegarrien gainean.
Hiri Ereduaren zinegotzi Borja Rodriguezek aditzera eman duenez, “material berri eta kalitate handikoarekin egin da, hala nola dentsitate handiko polietilenoarekin”, kolore berde argi eta ilunak ditu, estetika naturalagoa izateko eta bertan partidak jokatzen duten jokalarientzako arriskuak saihesteko.
Belar artifiziala berritzea ez da izan obretako zaharberritze bakarra, instalazioan beste hainbat hobekuntza ere egin dira; esaterako, aulkien eremuak espazio handiagoa eduki dezan hegalak handitu dira, ateak ordezkatu dira eta iparraldeko eremuan babes sare berri bat instalatu da. Aipatzeko, jokalekua inguratzen duten kanaletak aldatu dira baita seiko kanoidun ureztatze sistema berri bat jarri ere.
Udal futbol zelaietako inbertsioen egituran, hurrengo lanak Zaramagan eta Adurtzabalen egitea aurreikusi da. Obrak dagoeneko esleitu dira eta laster hasiko dira. Bi zelai eta instalazioak modernizatzeko prozesuak 962.020,20 euroko inbertsio globala beharko du (BEZ barne), eta amaitutakoan, Zaramagak eta Adurtzabalek ere azken belaunaldiko futbol zelai modernoak izango dituzte.