26 geltoki ditu, 11 kilometro inguruko ibilbidean banatuta
Tuvisa Gasteizko autobusen udal konpainiaren 11 linea berriak aurkezpen instituzionalerako ibilbidea egin du, martxan jarri baino egun bat lehenago. Bidaian, Sofia Erregina 4ren eta Luis Olariaga/Arriagako Atearen arteko ibilbide osoa egin ahal izan da, eta Zabalgana eta Lakua-Arriaga auzoen arteko zeharkako lotura hobetuko duen linearen ezaugarri nagusiak bertatik bertara ezagutu dira.
Ekitaldian parte hartu dute Beatriz Artolazabal Gasteizko alkateorde eta Espazio Publikoaren eta Auzoen zinegotziak, Izaskun Reyes Tuvisako presidenteak eta Iñaki Garcia Calvo Alderdi Popularrak Gasteizko Udalean duen bozeramaileak. Hirurek nabarmendu dute Udal Gobernuaren eta Alderdi Popularraren artean martxoan adostutako akordio politikoa, Zabalgana eta Lakua arteko garraio publikoaren konexioa posible egin duena.
Ibilbidean zehar, linea berriaren ezaugarri nagusiak azaldu dira. 26 geltoki ditu, 11 kilometro inguruko ibilbidean banatuta (joan-etorria), eta bi buruak ordu erdi baino gutxiagoan lotzeko aukera emango du. 11 linea ostegunean, uztailaren 23an, hasiko da zerbitzua ematen, 30 minutuko maiztasunarekin, eta zuzeneko konexio berria eskainiko du hirian biztanle gehien dituzten auzoetako biren artean. Gainera, osasun, hezkuntza, administrazio eta merkataritza ekipamenduetarako sarbidea hobetuko du.
Tuvisaren 11 linea berriaren lehen bidaia 06:10ean abiatuko da, Sofia Erregina kaleko 4 zenbakiko geltokitik, eta, 07:00etatik aurrera, autobusak 30 minutuko maiztasunarekin ibiliko dira egun osoan zehar.
