Arabako Foru Aldundiak Uribarri Ganboako urtegia urte osoan gozatzeko gonbita egin du, esperientzien katalogo berri baten bidez, modu aktiboan aurkitzeko haren natura nabarmena, biodibertsitate aberatsa eta ondare historikoa. ‘Uribarri Ganboako urtegia. Esperientzia turistikoen katalogoa‘ gidak inguruko enpresek bideratutako herritar guztientzako 15 jarduera proposatuko ditu, besteak beste, barruko hondartzak, argazkiak ateratzeko ibilbideak, zikloturismoa, mendiko ibilaldiak, birding, urpekaritza, astronomia eta kayak bidezko kirol arrantza.
Cristina Gonzalez Enplegu, Merkataritza, Turismo eta Foru Administrazioaren Saileko foru diputatuak aurkeztu du proposamen berria asteazken honetan. Turismo garapeneko estrategia integral baten barruan dagoela adierazi du, eta «Araba kalitatezko helmuga iraunkor gisa finkatzea, sektorearen sasoiz kanpoko eskaintzan aurrera egitea eta bidaiarien fluxuak lurraldeko eskualde guztietan banatzea» dela helburua.
Nabarmendu duenez, esperientzia turistikoen katalogo berriarekin, «Gasteizko ateetan dugun naturgune paregabe bat ezagutarazten dugu, eta arabarren eta bisitarien eskura jartzen ditugu lekua ezagutzeko planak, urtaro guztietan gozatzeko aproposak direnak». «Gainera, eta hori garrantzitsua da, inguruko enpresei tresna bat eskaintzen diegu Araban jarduera, aberastasuna eta enplegua sortzen jarraitzeko«, gaineratu du.
Marc Currius izan da ekimena garatzeaz eta gauzatzeaz arduratzen dena. ‘Uribarri Ganboako urtegia. Esperientzia turistikoen katalogoa‘ proposamena paperezko 64 orrialdeko argitalpen bat da, eta eskuragarri egongo da Arabako udalen eta eskualdeen turismoko bulegoetan datozen egunetan. Gidarekin batera, aurkezpenak eta sustapen kanpainak egingo dira sare sozialetan ikus-entzunezko materialen bidez.
Katalogoaren sarrerako kapituluak urtegiaren historia, ezaugarriak eta espazio natural gisa izan duen bilakaera azaltzen du, eta ondorengoak, Landako eta Garaioko barnealdeko hondartzei buruzko jakingarriak ematen ditu. Jarraian, inguru horretako turismo aktiboko enpresek natura, fauna, flora eta urtegiko ondarea bizi izateko, sentitzeko eta gozatzeko eskainitako 15 esperientzia deskribatzen ditu.
NATURA ETA ONDAREA
Esperientzia horiek bi gairen inguruan bildu dira. Lehenak, ‘Urtegia urte osoan zehar‘ izenekoak, hamar esperientzia jaso ditu, Natura 2.000 Sarean sartutako eremuaren aberastasun naturala lau urtaroetan ezagutzeko, hala nola gaueko hegaztien behaketa, orkidea basatien zeharreko ibilbidea, udazkeneko koloreak eta oreinaren marrualdia, eta argazkiak ateratzeko ibilbidea.
‘Urpean geratutako historiak‘ bigarren multzoak, berriz, Ganboa haranaren iragana ezagutzeko bost esperientzia eskaintzen ditu, besteak beste, urpean geratu ziren antzinako herri eta eraikinen aztarnak ikusteko gidaturiko urpekaritza, antzinako herrien historia eta inguruaren biodibertsitatea interpretatzeko ibilbideak, urtegiaren historia ezagutzeko presarako interpretazio bisita eta eremuaren ikuspegi berri baten eskaintza kayaketik.
