190 plaza publiko berrirekin eta hurrengo hilabeteetan 100 plaza gehigarri baino gehiagorekin
Gizarte eta zaintza politikak indartzea izan zen Arabako legegintzaldiko ardatzetako bat, arreta sare publikoa zabaltzeko eta mendekotasunari, zahartzeari nahiz gizarte premia berriei erantzuteko hainbat neurri bultzatuta. Egoitza eta eguneko zentro berriak, zaintza komunitarioko ekimenak eta kolektibo zaurgarrienei zuzendutako baliabide espezializatuak izan ziren eraldaketa horren adierazle nagusietako batzuk.
Ramiro González Arabako diputatu nagusiak aldarrikatu du Foru Aldundiak gizarte eta zaintza politikak indartzeko duen konpromisoa, egungo legegintzaldiko lehentasun nagusietako bat. Bere hitzaldian azpimarratu duenez, Foru Gobernuak baliabideak, zerbitzuak eta prestazioak zabalduz erantzun die biztanleriaren zahartzearen erronkari eta gizarte premia berriei, eta Araba «zainketen arloko erreferentziazko lurralde» gisa finkatu du.
Diputatu nagusiak nabarmendu du ahalegin hori egiteko, aurrekontu konpromiso «izugarria» egon dela. «Azken hiru urteetan, Gizarte Ongizaterako Foru Erakundearen aurrekontua % 20 hazi da, 2023an baino 48 milioi euro gehiago. Bultzada ekonomiko horri esker, arreta sare publikoa handitu ahal izan da, eta 190 plaza berri sortu dira hainbat eremutan».
Legegintzaldian zentro eta zerbitzu berriak ireki dira autonomia pertsonala sustatzeko eta familiei laguntzeko. Horien artean, honako hauek nabarmentzen dira: adimen desgaitasuna eta autismoaren espektroko nahasmendua duten pertsonentzako Lakondoa egoitza zentroa eta eguneko zentroa, Zabalgana eguneko zentroa eta Laudioko etxebizitza lagunduak, bai eta hainbat baliabide espezializatutan osasun mentaleko arazoak dituzten pertsonentzako plaza berriak ere. Indarkeria matxistaren biktimentzako baliabideak ere indartu dira, egonaldi ertaineko bigarren egoitza zentro batekin eta harrera etxebizitza berriekin Aiaraldean. Bestalde, gizarte bazterketako egoeran dauden pertsonentzako baliabideak hazi egin dira Berrasi zentroaren eta Housing First metodologian oinarritutako etxebizitzen bidez.
Baliabide berriak sortzeaz gain, Foru Aldundiak lehendik dagoen sarea «modernizatzen eta egokitzen» jarraitzen du. Amurrioko Armuruko San Anton egoitza eta Etxebidea egokitza handitu eta hobetzeko lanei Gizarearen pixkanakako hedapena gehitu behar zaie. Azken hori harremanak ardatz dituen arreta eredu forala da, eta datozen hilabeteetan baliabide sare osora zabalduko da, landa eremura barne.
Ramiro Gonzálezek, gainera, legegintzaldiko hurrengo mugarrietako bat nabarmendu du: 100 egoitza plaza berri baino gehiago jartzea adineko pertsonentzat. Horien artean, Samaniegoko foru egoitza berrituko 44 plazak nabarmentzen dira, erabat berrituak eta egungo beharretara egokituak. Hain zuzen ere gaur, nabarmendu duenez, lehenengo erabiltzaileak hasi dira lanean. Gogorarazi du, halaber, urritik aurrera erantzukizun publikoko sarea zabalduko dela, Gasteizen, Gorbeialdean eta Aiaraldean erabilgarri egongo diren itunpeko beste 60 plazarekin.
