Baskonia Alaves Taldeak Ondare Proiektuaren fase berri bat aurkeztu du gaur. Taldeak bultzatutako hazkunde-plan estrategikoa da, lehiakortasuna indartzeko, lurraldean duen errotzea sendotzeko eta Araba nazio eta nazioarte mailan proiektatzeko, kirolaren, hezkuntzaren, osasunaren, entretenimenduaren eta ezagutzaren bidez.
Ekitaldian Josean Querejeta Arabako Baskonia Taldeko presidenteak eta Ramiro González Arabako Diputatu Nagusiak hartu dute parte, eta aurkezpen instituzional batean proiektuaren bilakaera (2024ko abenduan abiarazi zenetik), lortutako mugarriak eta datozen urteetarako aurreikusitako garapen-ildo nagusiak errepasatu dituzte.
Planaren fase berriak Fernando Buesa Arena gunea eta haren ingurua eskuratzeko proposamena jasotzen du, proiektuari hazten jarraitzeko beharrezko tresnak emango dizkion urrats estrategiko gisa. Eragiketa horri esker, pabiloia, aparkalekua eta bere jarduerari lotutako lursailak epe luzeko ikuspegi global batean integratu ahal izango lirateke, instalazioa modernizatzera, haren erabilera handitzera, jarduera ekonomiko berria sortzera eta Buesa Arena nazioarteko erreferentziazko esparru bihurtzera bideratuta.
Kirol profesionalak abiadura handian eboluzionatzen duen eta klubak gero eta gehiago lehiatzen diren testuinguru batean, eredu globalak, dibertsifikatuak eta azpiegitura handietan oinarrituak, Baskonia Alaves Taldeak ezinbestekotzat jotzen du taldeak maila gorenean mantentzeko urratsak ematen jarraitzea.
Arabak Ligan eta Euroligan dauden klubak dituzten beste lurralde batzuek baino errealitate demografiko mugatuagoa du, baina, era berean, ibilbide berezia, kudeaketa-gaitasun frogatua eta ikuspegi aitzindaria ditu, eta, horri esker, hamarkadetan zehar proiektu handiagoekin lehiatu ahal izan da.
